Kongerera agaciro ibikomoka ku buhinzi n’ubworozi ni imwe mu nzego zigaragazwa nk’izifite amahirwe menshi yo guhanga imirimo no guteza imbere ishoramari ry’urubyiruko mu Rwanda. Ni muri urwo rwego inkuru ya Mutoni GoodLuck, washinze Goodness of God Ltd, igaragaza uko ubuhinzi bushingiye ku bumenyi, ubushakashatsi n’udushya bushobora kuvamo ibicuruzwa bifite agaciro ku isoko ry’imbere mu gihugu no ku rwego mpuzamahanga.
Goodness of God Ltd itunganya ibikomoka ku buhinzi nk’ibitunguru, tangawizi, tungurusumu na rosemary, ikabivamo amavuta y’umusatsi yitwa KURA, afasha mu kurwanya ikibazo cyo gucika kw’umusatsi, kudakura neza no kwita ku ruhu rw’umutwe. Uyu mushinga ugaragaza uburyo ibikomoka ku buhinzi bishobora kongerwa agaciro bikavamo ibicuruzwa by’ubwiza bifite isoko rinini.
Mu 2026, uyu mushinga wegukanye umwanya wa mbere n’igihembo cya Miliyoni 30 z’Amafaranga y’u Rwanda (30,000,000 Frw) muri AYuTe Africa Challenge Rwanda, itegurwa na Heifer International Rwanda. Ibi byarushijeho kugaragaza uruhare rw’urubyiruko mu guhindura ubuhinzi igice cy’ubucuruzi n’udushya.
Urugendo rwa Goodness of God Ltd rwatangiye mu 2019, aho Mutoni GoodLuck yashakaga igisubizo kirambye ku bibazo by’umusatsi byugarije benshi, cyane cyane abagore n’abakobwa bakoresha imiti irimo ibinyabutabire byinshi. Ibi byamuteye gushaka uburyo bw’umwimerere bushingiye ku bimera.
Mu gushaka ubumenyi, yagiye muri Tanzania kwiga uburyo hakorwa ibicuruzwa byita ku musatsi. Nyuma yaje gusanga ibimera byifashishwaga bidahagije mu Rwanda, bituma atangira ubushakashatsi ku bihingwa biboneka mu gihugu.
Ubwo bushakashatsi bwerekanye ko ibitunguru, tungurusumu, tangawizi na rosemary bifite ubushobozi bwo gufasha umusatsi gukura neza no kuwurinda gucika. Mu 2024, igitekerezo cya KURA cyatangiye kujya mu buryo bw’ubucuruzi bufatika.
Mutoni GoodLuck agira ati:
“Natangiye nshaka igisubizo cyafasha umusatsi wanjye, ariko ubu ibyo nabonye byabaye igisubizo ku bantu benshi, bikanafasha abahinzi kubona isoko rishya ry’umusaruro wabo.”
Uyu mushinga ntiwagarukiye gusa ku bwiza bw’umusatsi, ahubwo wanagize uruhare mu gukemura ikibazo cy’abahinzi b’ibitunguru n’ibindi bihingwa bahuraga n’isoko ridahagije, rimwe na rimwe umusaruro ukangirika cyangwa ukagurishwa ku giciro gito.
Ubu Goodness of God Ltd ikorana n’abahinzi, ibafasha kubona imbuto nziza, ibaha amahugurwa ku kongera umusaruro no kuwugeza ku rwego rw’ubuziranenge bukenewe ku isoko. Abahinzi banahabwa ubumenyi bwo gukoresha ikoranabuhanga ryoroshya kurwanya indwara n’ibyonnyi by’imyaka hakiri kare.
Mutoni akomeza agira ati:
“Ubuhinzi ntibugarukira ku guhinga no kugurisha gusa. Iyo igihingwa gihinduwe igicuruzwa gifite agaciro, kiba gitangiye urugendo rw’ubucuruzi n’inganda.”
Agaragaza ko ubuhinzi budakwiye gufatwa nk’umurimo wo hasi, ahubwo ko ari urubuga rwagutse rw’ishoramari, udushya n’inganda nshya zishingiye ku bikomoka ku buhinzi.
Igihembo cya AYuTe Africa Challenge Rwanda cyabaye ishimangira ry’urugendo rwabo, kigaragaza ko imbaraga, icyerekezo n’ubunyamwuga bitanga umusaruro. Mutoni avuga ko iyi ntsinzi ari iy’abahinzi, ikipe ye n’ababashyigikiye bose kuva ku ntangiriro.
Aya mafaranga yahembwe azakoreshwa mu kongera ubushobozi bw’uruganda, kugura ibikoresho byongera umusaruro no kunoza imikorere, ndetse no kwagura isoko ry’abahinzi bakorana na Goodness of God Ltd mu bihingwa birimo ibitunguru, tangawizi, tungurusumu na rosemary.
Izindi mbaraga zizashyirwa mu kuzamura ubuziranenge bw’ibicuruzwa no kubitegura amasoko mpuzamahanga, mu gihe ibikorwa byo kwagura isoko byatangiye kugera mu bihugu birimo Nigeria na Canada.
Mu myaka itanu iri imbere, icyerekezo ni uko Goodness of God Ltd izaba uruganda rukomeye muri Afurika rukoresha ikoranabuhanga rigezweho, rukorana n’abahinzi benshi, ku buryo KURA izaba kimwe mu bicuruzwa by’ubwiza bikomoka ku buhinzi bw’u Rwanda bizwi ku rwego mpuzamahanga.
Ku rubyiruko n’abagore bafite inzozi zo gutangira imishinga ishingiye ku buhinzi n’ubworozi, Mutoni GoodLuck atanga ubutumwa bugira buti:
“Tugire umwete wo kubyaza umusaruro amahirwe dufite. Tangira, uhangane n’udushya, kandi ukoreshe amahirwe nk’aho ari aya none gusa.”
Jean Bernard MUKUNDENTE/RYAF Communication and PR
Email:b.mukundente@ryaf.rw/ ryafcommunication@gmail.com